КОЊУФЦА: Тврди дека преку динарот Вучиќ ги уценувал Србите на Косово

Според косовските власти, тоа што динарот нема да се употребува ќе придонесе за интеграција на Србите. 

Претседателот на Собранието на Косово, Глаук Коњуфца изјави дека укинувањето на српскиот динар како валута во Косово помага за интеграција на српската заедница во земјата, јави дописникот на МИА од Приштина. Коњуфца изјави дека со внесувањето на динарот, српскиот претседател Александар Вучиќ преку најголемата партија на косовските Срби, Српска Листа, ги уценувал граѓаните на оваа заедница во Косово. Рече дека динарот служел и како средство и за корумпирање на луѓето, со оглед дека се исплаќале пари во готово, немало никакви списоци, никој не сносел одговорност.

„Динарот беше инструмент што некој го носеше физички од Белград, со комбе, а таму некои функционери на Вучиќ преку Српската листа, одеа по куќите и ги делеа парите, ќе те погледнеа намуртено и ќе ти побараа верност. Ова е физичката причина за распределбата на динарот. Тоа не е едноставна битка за благосостојба“, рече Коњуфца.

Според него, тоа е практично вршење на притисок од Српската листа и Белград врз секое српско семејство во Косово. Србија се жали поради оваа мерка. Косовскиот премиер Албин Курти кажа дека динарот не е „укинат“, туку граѓаните ќе треба да користат евро.