Кој продаде 35 хектари оранжерии по цена од еден стан?
Над 75 отсто од сите акции на светиниколските оранжерии „Градинар“ вчера на берза се продадени за 81.500 евра. Овие оранжерии кои располагаат со 35 хектари земја лани имале приход поголем од 400.000 евра и добивка од 34.000 евра.
Светиниколската компанија за производство на храна од оранжерии „Градинар“ за некој ден добива нов сопственик. Вчера на Македонската берза за хартии од вредност во една трансакција беа продадени 111.444 акции со право на глас од „Градинар“ за вкупна цена од 81.500 евра.
Станува збор за продажба на 75,3 отсто од сите акции во светиниколски „Градинар“. Цената по акција изнесува 150 денари, а таа акција според историските достапни податоци не е тргувана на берзата неколку години наназад.
Според официјални податоци од базата на државниот Централен регистар сопственик на светиниколски градинар досега беше Драгица Караманолева која воедно е и овластено лице на компанијата и извршен член на бордот на директори. Сега таа се јавува и како продавач на акциите. Заедно со Караманолева во бордот на компанијата се неизвршните членови Весна Руменова и Наце Цеков.
„Градинар“ во минатата година имал приходи во вредност од 415.000 евра, а остварил профит од работењето во износ од 34.000 евра. Токму заради овие податоци по малку е чудно зошто успешна компанија која остварува добивка се продава по цена што е пет пати пониска од приходите што ги остварува на годишно ниво.
„Градинар“ лани вработувал 15 лица, според официјални достапни податоци од базата на ЦРМ.
Во јавно достапни податоци преку интернет пребарување се доаѓа до оглас од јули 2022 година во кој оваа компанија се нуди на продажба. Пишува дека имотот на „Градинар“ е 35 хектари, дека има 12 хали од по 1,2 хектари пластеници (оранжерии) и дека капацитетот се загрева со котли.
Акцијата на „Градинар“ не е котирана на Официјалниот пазар на берзата туку се тргува на слободниот пазар и нема обврски за редовни и периодични известувања. Последната објава на оваа компанија датира од ноември 2022 година и се однесува на годишното работење во 2021 година. Тогаш „Градинар“ имал приход вреден 619.000 евра и добивка од 25.000 евра.
Р.Ф.
