Кој ќе заработи 1,6 милиони евра од либерализацијата на македонските железници во 2024?
Од почетокот на оваа година за прв пат во историјата започнува либерализацијата на македонските железници, а за тоа од операторите кои ќе ги користат македонските пруги за транспорт на стока и суровини во 2024, како за старт, ќе бидат наплатени 1,6 милиони евра.
Во објавениот бизнис план на Јавното претпријатие Железници Инфраструктура е наведено дека се планирани вкупно 98.227.925 денари од други превозници – ставка што за прв пат се објавува. Тоа се пари кои ќе се наплатат од новите возови за товарен транспорт со либерализацијата на пазарот.
По изгласувањето на Законот за либерализација на железничкиот сообраќај, од почетокот на оваа година се отворат вратите и за други компании од регионот, кои сакаат да оперираат по македонските железнички пруги.
Со ова власта очекува да се подобри конкурентноста, а придобивки би имале и граѓаните и компаниите. Македонија беше една од последните земји во регионот која сè уште немаше либерализација, а се очекува таа да го подигне сообраќајот на повисоко ниво.
„Либерализацијата не значи продажба, либерализацијата значи отворање на пазарот за повеќе оператори да можат да оперираат по македонските железнички пруги“, изјави претходно министерот за транспорт и врски Благој Бочварски.
Истовремено, беше истакнато дека ниту граѓаните, ниту Владата не се задоволни од функционирањето на АД Железници Транспорт, претпријатието кое во овој случај се чини дека е најголемиот губитник. Од „Железници Транспорт“ и натаму се очекува да остане доминантен оператор во товарниот превоз за компаниите, а за тоа на инфраструктурното претпријатие во 2024 ќе треба да му плати 163.771.436 денари.
„Железници Инфраструктура“ оваа година очекува значително поголеми приходи од товарниот транспорт, поради либерализацијата, но и поради тоа што наплатата минатата година од објективни причини била далеку помала поради оштетувањата во Македонија и Грција. Приходите од надоместот за користење на железничката пруга ќе се зголемат од 4 на 7 милиони евра. Плус тука се стандардно и оние што ги дава државата од буџетот.
„Како резултат на стапување во сила на либерализацијата на железничкиот пазар, се планира зголемување на бројот на возови во товарниот сообраќај, кој би се реализирал како резултат на влез на нови оператори т.е. железнички превозници во железничкиот сообраќај“, пишува во бизнис планот на ЈП за железничка инфраструктура.
Упатените со години алармираат за потребата од либерализација на железничкиот превоз во земјава. Државата со години го одложуваше влезот на приватни оператори по нашите пруги. Но со таквите одложувања, наместо развој на железницата во Македонија, сведочиме на намален обем на превоз на стока и патници од државната железница, како и натамошни долгови од железничките претпријатија.
А.К.
