Кој е најверниот навивач на ФК „Силекс“? Лани му донираше 500.000 евра!
ФК „Силекс“ лани немал приходи од продажба на влезници ниту од телевизиски права. Неговиот буџет во целост е составен од донации од компании од холдингот на АД „Силекс“. Најголем донатор лани била националната телевизија „Сител“ со донација од половина милион евра
Фудбалскиот клуб „Силекс“ можеби нема многу навивачи, но сигурно ги има најверните и најдоследни поддржувачи кога треба да се брцне во џеб и да се покаже поддршка на дело!
Официјалните финансиски показатели за 2022 година на еден од најуспешните македонски фудбалски клубови покажуваат дека повратникот во македонската елитна фудбалска лига имал на располагање буџет од 845.500 евра! Тоа е голема и повеќе од пристојна сума пари за македонскиот фудбал.
Интересно е тоа што ФК „Силекс“ лани немал ниту денар приходи од продажба на влезници, ниту пари од телевизиски права. Единствените приходи на клубот од Кратово се донациите и спонзорствата од неговите поддржувачи.
А најголем фан на ФК „Силекс“ лани била националната телевизија „Сител“. Според финансискиот извештај на независната ревизија лани оваа телевизија, која важи за најгледана во Македонија, донирала половина милион евра и обезбедила 60 отсто од сите приходи на фудбалскиот клуб во таа година.
Други донатори на клубот биле уште три фирми од холдингот „Силекс“. Тоа се друштвото специјализирано за производство сунѓери „Силпен“ од Кратово. Таа фирма донирала 81.300 евра. ФК „Силекс“ лани со донации го помогнале и АД „Силекс“ со 20.000 евра и „Силкрат“ со 11.000 евра.
Од друга страна ФК„Силекс“ лани во својата повратничка сезона во Првата македонска лига потрошил 840.000 евра. Најголема расходна ставка се трошоците за фудбалерите и вработените лица во клубот. За таа намена во текот на 2022 година клубот на плати и надоместоци потрошил 554.000 евра, а уште 274.000 евра се трошоци потреби за останатото оперативно работење на клубот.
Добивката на крајот на 2022 година на акционерското друштво ФК „Силекс“ изнесува 4.200 евра. Во однос на претходната година добивката во 2022 година е намалена за 50 отсто.
ФК „Силекс“ е фудбалски клуб со најдолг прволигашки стаж во независна Македонија. Од првото првенство одржано во 1992/93 година па до сега (сезоната 2023/24 година) ФК „Силекс“ само една сезона не играл во прволигашка конкуренција. Три пати бил првак на Македонија, а два пати го освоил и Купот на Македонија. ФК „Силекс“ постои од 1965 година и е еден од најмладите македонски фудбалски клубови.
Р.Ф.
foto freepik.com
