Клучниот далековод кон Албанија, за кој добивме 12 милиони евра грант, е заглавен 10 години
Проектот од највисоко стратешко значење за енергетската стабилност на Македонија и поврзувањето со регионот – изградбата на 400-киловолтниот далековод кон Албанија – е во целосен застој и бележи слаба реализација иако е започнат уште во 2015 година, открива алармантниот извештај на Државниот завод за ревизија.
Станува збор за интерконективниот далековод Битола-Елбасан, проект кој ревизорите го опишуваат како клучен последен дел од енергетскиот Коридор 8. Неговото значење е потврдено и од Енергетската заедница, која го ставила на прво место на својата листа на проекти од значење (т.н. PECI листа).
Покрај стратешката важност, за овој проект Македонија го добила и првиот инвестициски
грант преку Инвестициската рамка за Западен Балкан (WBIF) во износ од 12.000.000 евра.
И покрај сето ова, ревизорите констатирале дека постои сериозен застој во неговата имплементација.
„Со извршената ревизија констатиравме дека има застој на овој проект и слаба реализација кои имаат влијание и врз развојот на регионалната енергетска структура, енергетската безбедност на земјата како и стабилност на електричната мрежа“, се вели во извештајот на ДЗР.
Деценискиот неуспех да се комплетира оваа клучна врска, заклучуваат ревизорите, претставува сериозна пречка за зголемување на капацитетите за пренос на струја низ регионот и ја поткопува енергетската сигурност на државата.
