Клиниката „Козле“ остана без вода – пациенти се примаат, но лабораторијата е во прекин
Клиниката за респираторни заболувања кај деца „Козле“ денеска целосно остана без вода, откако изминатите денови во објектот се бележеше слаб воден притисок. Причината, како што појасни директорката Катерина Бошкова, не е технички дефект, туку локацијата на установата – која се наоѓа во високата зона на градот, исто како и населбата Водно, каде што сè уште нема редовно водоснабдување.
„Засега функционираме, пациентите се примаат редовно, но лабораторијата за венска крв моментално не работи. Обезбедени се цистерни за техничка вода за одржување хигиена, а за пиење добиваме донации. Проблемот настанува поради зголемената потрошувачка на вода и недостигот кој се јавува во високите зони. Ни беше кажано дека ситуацијата ќе се нормализира, но немаме конкретни рокови“, изјави Бошкова за САКАМДАКАЖАМ.МК.
Незадоволството расте и кај жителите на Водно, кои велат дека проблемот со водоснабдувањето трае со недели. Меѓу нив е и новинарот Ивор Мицковски, кој на својот профил на Фејсбук напиша дека на улицата „Салвадор Аљенде“ речиси две недели нема вода од пладне до полноќ.
„Ако навистина има енормна потрошувачка, тогаш треба да се воведат рестрикции низ цел град, а не само еден дел да биде жртва. На 40 степени да нема вода е срамота – и тоа во главниот град. Не може само некој да ги сноси последиците од неразумното трошење и градење“, напиша Мицковски.
Од ЈП „Водовод и канализација“ сè уште нема официјална информација кога проблемот ќе биде надминат, ниту дали се разгледува можноста за воведување рестрикции на градско ниво.
