Клековски: Секој петти вработен во униформните служби е на боледување – сериозни злоупотреби со „цик-цак“ боледувања и во приватни компании!
Директорот на Фонд за здравствено осигурување на Македонија, Сашо Клековски, во емисијата Ноќно студио на 4ТВ проговори и за злоупотребите во системот за боледувања.
Како што вели, во соработка со Министерство за внатрешни работи, биле извршени контроли кај нив при што било утврдено дека кај значителен дел од издадените боледувања не биле почитувани процедурите.
„Кај секое петто боледување имаше неправилности“, изјави Клековски.
Тој потенцира дека фондот во моментов нема целосен увид во влијанието на боледувањата, особено затоа што краткорочните отсуства ги покриваат работодавачите, додека фондот ги финансира само боледувањата подолги од 30 дена.
Клековски вели дека во мала средина како што е Македонија често постои и притисок врз лекарите со цел „да излезат во пресрет“, а додаде и дека фондот направил значително зголемување на капитацијата за матичните лекари за 30 проценти, со цел подобрување на примарната здравствена заштита, но и со очекување за поголема одговорност.
„Го зголемивме финансирањето, но очекуваме и почитување на правилата. Боледувањата, како и препишувањето антибиотици и анксиолитици, се категории каде што има сериозни казни ако не се следат процедурите“, истакна Клековски.
Според Клековски, најчестите злоупотреби се т.н. „цик-цак“ боледувања, односно вработени земаат кратки боледувања, се враќаат на работа само еден ден со цел да избегнат контрола, па повторно отвораат ново боледување по друга основа.
„Целта е да се сузбијат лажните боледувања, за да има доволно средства за оние кои навистина се болни“, нагласи Клековски, додавајќи дека по подолг период на боледување, пациентите се упатуваат на проценка пред инвалидски комисии.
Според него, проблемот не е ограничен само на јавниот сектор, туку е присутен и кај приватните компании. Како пример наведе фирма каде дури 15 проценти од вработените биле на боледување.
Особено загрижувачка е состојбата во т.н. „униформни“ сектори, како што се полицијата, одбраната и здравството. Во некои здравствени установи, како што посочи, дури секој петти вработен е на боледување.
Клековски објасни дека најголем дел од трошоците за кратките боледувања ги сносат работодавачите, додека фондот покрива боледувања подолги од 30 дена, каде контролите се построги и процедурите посложени.
„Најголемите злоупотреби се токму кај кратките, прекинати боледувања. Затоа мора да работиме на нивна контрола, бидејќи влијаат врз продуктивноста и целиот систем“, порача Клековски.
