Клековски: Без жалба нема решение – граѓаните да пријават сомнителни интервенции
Директорот на Фондот за здравствено осигурување на Македонија, Сашо Клековски, ги повика сите граѓани кои сметаат дека претрпеле штета при кардиохируршки интервенции, да поднесат официјална жалба за нивниот случај.
„Без жалба – нема решение. Потребни се конкретни случаи и аргументи, бидејќи во моментов имаме илјадници пациенти со вградени стентови. Ако започнеме проверка досие по досие, тоа би траело со години. Затоа ги охрабрувам сите кои се чувствуваат оштетени да достават жалба, уверувам дека секој случај ќе биде истражен и разгледан,“ изјави Клековски.
Тој потсети дека Фондот има договори со јавни и приватни здравствени установи единствено во делот на кардиохирургијата, а не и во кардиологијата.
Апелот на Клековски следува по неодамнешната изјава на кардиохирургот Сашко Кедев, кој предупреди дека во одредени приватни болници се изведуваат непотребни интервенции и операции со единствена цел профит.
По овие наводи, Министерството за здравство најави формирање специјална комисија составена од експерти од три различни земји, која ќе ја следи и контролира работата на приватните здравствени установи. Дополнително, ќе продолжат и редовните контроли во јавните болници каде се изведуваат вакви интервенции.
