Ким Јонг Ун ја заврши посетата на Русија: Во театар ја гледаше „Заспаната убавица“, а во аквариум претстава со китови, делфини, фоки и моржот Миша
Севернокорејскиот лидер Ким Џонг Ун денеска со својот оклопен воз го напушти рускиот Далечен Исток и се упати кон севернокорејската граница, пренесоа руските новински агенции.
„Возот на Ким Џонг Ун се упати кон граничната станица Хасан. Растојанието е околу 250 километри“, вели ТАСС.
На последниот ден од посетата на рускиот Далечен Исток, севернокорејскиот лидер ги обиколи универзитетите и аквариумите.
Руската новинска агенција РИА Новости објави видео снимки на кои Ким, придружуван од највисоките функционери, разговара со руски колеги со помош на преведувачи додека бил на обиколка на универзитет на островот Руски.
Еден ден по посетата на руските бомбардери со нуклеарно оружје и друго напредно оружје, Ким во неделата отиде во најголемиот аквариум во Русија.
Севернокорејскиот лидер гледал перформанс со китови, делфини, фоки и Миша моржот, кој особено му се допаднал, јавуваат руските медиуми.
Ким Џонг Ун е во Русија од вторникот, а за време на посетата разговараше и со рускиот претседател Владимир Путин.
Синоќа во театарот ја гледаше балетската претстава „Заспаната убавица“.
Севернокорејската новинска агенција КЦНА објави дека Ким бил пречекан со овации во театарот и дека изразил „длабока благодарност до изведувачите и театарот за импресивниот и елегантен балет со висока уметничка вредност“.
Руските државни медиуми објавија дека Ким го напуштил театарот по првиот чин на балетската претстава.
