Кичевски: Партијата што 11 години ја уназадуваше државата, денес го уназадува Град Скопје – ВМРО-ДПМНЕ: Инвестициските програми ги гласа неговата СДС, ДУИ и фолирантите од Левица
Васко Кичевски од СДСМ денеска на прес конференција посочи дека една и пол година во Град Скопје владее хаос и неспособност од градоначалничката Данела Арсовска и ВМРО-ДПМНЕ.
„Бројни важни проекти се стопирани како што е реконструкцијата на Универзална сала, изградбата на улицата Есенинова и мостот на булевар АСНОМ, а клучката и кружниот тек кај Момин поток се градат далеку поспоро од предвиденото темпо.
Но затоа забрзано се одвива партизацијата на градската администрација и постојаната смена на директори на јавните градски претпријатија и установи.
Нема нови проекти и решенија, нема крупни градежни зафати, но затоа од страна на Арсовска и ВМРО-ДПМНЕ има кавги за тендери и провизии и популистички иницијативи да се врати споменикот на Ќосето – симболот на режимот на Груевски.
Ете што се случува кога шпицниот градоначалник и заложник на Димитар Апасиев и Левица, Христијан Мицкоски ќе ја добие власта во градот.
Ништо не се менува во ВМРО-ДПМНЕ, партијата што 11 години ја уназадуваше државата, денес го уназадува Град Скопје.
И тогаш и сега на ВМРО-ДПМНЕ потребите на граѓаните им се на последно место, а личните и бизнис интерес им се пред сѐ.
Арсовска и другите скопски градоначалници од ВМРО-ДПМНЕ се најнеспособните и најнеуспешните градоначалници досега“, вели Кичевски.
На ова реагираше и ВМРО-ДПМНЕ, која вели дека Кичевски треба да е подобро информиран, сите инвестициски програми зад кој се кријат бизниси, во Советот на Град Скопје без исклучок ги гласа неговата СДС, ДУИ и фолирантите од Левица
„Кичевски е потребно да запраша зошто некој го мести во СДС толку очигледно, па мора со сила да се прави недоветен. Добро е да биде информиран, ако не знаел или не му кажале дека сите инвестициски програми зад кој се кријат бизниси, во Советот на Град Скопје без исклучок ги гласа неговата СДС, ДУИ и фолирантите од Левица.
А, кога сме кај Кичевски причината зошто тој мора, на очиглед на целата јавност да збори глупости, веројатно е поради фактот што е уценет и знае дека брзо ќе дојде времето кога ќе мора да одговара за реалните сомнежи за набавка на електронскиот систем за пораки на ПОЦ каде што тој токму беше дел“, велат од ВМРО-ДПМНЕ.
