КАНЦЕЛАРИЈА ЗА КОСОВО И МЕТОХИЈА: Приштина ги „презедe“ шесте згради на територијата на Зубин Поток
Приштина ги „презедe“ шесте згради на територијата на Зубин Поток, кои се градени со средства на српската Влада, велат од Канцеларијата на Владата на Србија за Косово и Метохија.
Во соопштението од Канцеларијата се наведува дека власта на косовскиот премиер Албин Курти „без никаква правна основа запленила 107 станови наменети за станбени потреби на Србите од областа на Општина Зубин Поток“.
„По инцидентот на каналот Ибар-Лепенец, Курти продолжува да го напаѓа Зубин Поток, бидејќи неговите спинови и лажни обвинувања не одеа најдобро ниту кај меѓународната заедница, па сега се обидува да ги прикрие своите валкани траги предизвикувајќи нова криза и тензии на терен“, се истакнува во соопштението.
Специјалното обвинителство на Косово пред два дена соопшти дека ја продолжува истрагата за собирање на докази за нападот од 29 ноември врз каналот Ибар-Лепенец во Зубин Поток.
