Камбовски: Несреќата која се случи на „Партизанска“ ја потресе целата држава
Претседателот на Судски совет, Александар Камбовски, денеска изјави дека Судскиот совет ќе разгледува секој случај во кој има сомневање за пропусти на судиите при изрекување на пресуди, особено кога се во прашање сообраќајни несреќи и казнената политика на судовите. Тој нагласи дека е потребна сеопфатна анализа на казнената политика на судовите, која треба да покаже дали казните што се изрекуваат се соодветни и дали се одржува правичност.
„Се работи за случај кој ја потресе целата држава, изразуваме сочувство до семејството. Не би сакал во овие моменти на емоции да се носат брзи одлуки или заклучоци. Не е добро да се прават брзи промени во законите“, изјави Коцевски за случајот со Фросина Кулакова, која беше прегазена на пешачки премин. Во врска со револтот кај јавноста за преблаги казни за сторителите на вакви дела, Камбовски истакна дека не се согласува со такви состојби и дека ќе се разгледуваат сите случаи каде има пропусти.
Прашан за случајот на судијката Алексоска Стојановска, која предходно дала преблага казна за сторителот на слично дело, Камбовски изјави дека не е запознаен со детали за тој случај и не би коментирал додека не ги добие сите факти. Тој посочи дека ќе се истражуваат сите случаи каде што има пропусти и, ако се утврди виновност, ќе се санкционираат судиите.
Тој исто така напомена дека, иако Судскиот совет не е надлежен за истраги за корупција, во случај на сомневања за корупција или тргување со влијание, тие ќе ги препратат сознанијата до Јавното обвинителство, кое е надлежно за водене на такви истраги.
Претседателката на Академија за судии и обвинители, Ирина Трајковска Стрезоски, смета дека построги казни за сторителите на сообраќајни незгоди се пожелни и дека изготвениот нов Кривичен законик ќе понуди нови решенија. Таа додава дека овој нов Кривичен законик е веќе во фаза на превод и треба да биде доставен до Венецијанската комисија до крајот на годината.
Во исто време, продолжуваат протестите на граѓаните, кои бараат одговорност од институциите за трагичната смрт на Фросина Кулакова. Мирни собири беа одржани во Скопје, Неготино и Кавадарци, при што граѓаните изразија револт и бараа построги казни за сторителите на сообраќајни несреќи.
