Калас: ЕУ ќе продолжи да ја поддржува Македонија на патот кон полноправно членство
Европската Унија ќе продолжи да ја поддржува Северна Македонија на патот кон полноправно членство, истакна високата претставничка на ЕУ за надворешни работи и безбедносна политика, Каја Калас, за време на нејзината официјална посета на Скопје и средбите со државниот врв.
„Имавме конструктивен разговор во кој се осврнавме на повеќе клучни прашања. ЕУ стои до Северна Македонија. Вашата земја е првата во регионот што го потпиша Партнерството за безбедност и мир, со што покажавте лидерство и солидарност со Украина и Европа,“ рече Калас, нагласувајќи ја улогата на земјата како стабилен сојузник во регионот.
Калас ја издвои Северна Македонија како предводник во користењето на новиот План за раст на ЕУ за Западен Балкан. Според неа, тоа е показател за искрена ангажираност кон реформите и европската перспектива.
„Северна Македонија има место во Европската Унија. Веќе сте дел од нашата заедничка безбедносна рамка, што е исклучително важно во денешниов комплексен геополитички контекст. Ве охрабрувам да продолжите по истиот реформски пат и да ги направите потребните чекори за напредок во пристапните преговори,“ додаде таа.
Претставничката на ЕУ ја потврди поддршката на Брисел за борбата против корупцијата и зајакнувањето на правната држава – теми кои, како што истакна, остануваат темелни вредности на Унијата.
„Пред вас е важен изборен процес. Одлуката е во рацете на граѓаните, а ЕУ верува во европската иднина на целиот регион. Да продолжиме заедно напред – ЕУ ќе биде тука, покрај вас,“ заврши Калас.
