Како најстарата македонска автомобилска компанија ја зголеми добивката за 38 отсто?

Десет милиони евра приходи од продажба и сервисирање возила, технички прегледи, осигурително-брокерски услуги, рента-кар и испитен центар за полагање возачки. Тоа е портфолиото на приходи на „Аутомакедонија“ од кои како нето добивка за акционерите останале чисти над половина милион евра

„Аутомакедонија“ има добра деловна година! Тоа го покажуваат финансиските резултати од билансот на успех на најстарата македонска компанија специјализирана за продажба на нови возила и за сервисирање на возила.

Вкупните оперативни приходи на „Аутомакедонија“ лани изнесуваат 9,9 милиони евраи во споредба со претходната година се зголемени за 12 отсто. Ова е највисокиот приход што оваа компанија го остварила во период од три години.

Во вкупниот приход продажбата на домашен пазар учествува со 8,74 милиони евра. Во продажбата се вклучени приходите што ги генерира продажбата на нови возила од палетите на три производители, сервисот за возила, услугите во трите станици за технички преглед во Скопје, компанијата за осигурително-брокерски работи,сообраќајниот испитен центар за пелагонискиот регион и рента-кар компанијата. Вкупните приходи се зголемени за 12 отсто во споредба со претходната споредбена година.

Од останати приходи оваа компанија инкасирала уште 1,14 милиони евра, а тоа е 65 отсто повеќе од 2022 година.

Оперативните расходи процентуално го следат растот на приходите на „Аутомакедонија“. Лани изнесувале 9,25 милиони евра и биле зголемени за 15 отсто во однос на 2022 година.

При тоа трошоците кај најголемата расходна ставка „набавна вредност на трговски стоки“ е зголемена за 20 отсто до износ од 5,6 милиони евра. Трошоците за вработените се втора најголема расходна ставка и изнесуваат 1,54 милиони евра.

Соодносот на приходите и оперативните расходи креирал оперативна добивка од 625.000 евра. По билансирањето на финансиските приходи и расходи нето добивката на оваа компанија изнесува 536.000 евра и во споредба со претходната година е поголема за 38 отсто.

Детали од корпоративното образложение на резултатите се достапни на следниот линк https://www.seinet.com.mk/Default.aspx?lang=MK&docID=67285

„Аутомакедонија“ е основана во далечната 1947 година и на пазарот успешно опстојува 77 година. По трансформацијата на капиталот станува акционерско друштво. Нејзини актуелни покрупни акционери се Иванка Мојсова со 22,5 отсто од акциите со право на глас, Милан Ивановски со 17,9 отсто од акциите и трите деца за Светозар Јаневски: Кирило, Драгана и Јане со по 6,8 отсто од акциите наследени од нивниот татко.

Р.Ф.