„Како и природата денеска да тагува“ рече учесничка на трката „Сите за Кочани – трчаме заедно“
Со срцата и мислите кај Кочани, а со телото и духот на падините на Водно – стотици граѓани од седум градови денеска истовремено стартуваа во хуманитарната трка „Сите за Кочани – трчаме заедно“. Точно во 10 часот, во Скопје, Битола, Тетово, Струмица, Велес, Струга и Крива Паланка започна симболичната трка, во чест и сеќавање на 62-та жртви од катастрофалниот пожар што ја потресе Македонија.
Трката беше организирана од Делегацијата на Европската Унија и мрежата на „Јуроп Хаус“ по повод Денот на Европа, со цел собирање средства за настраданите семејства од трагедијата. Средствата од котизациите ќе бидат донирани на Црвениот крст и насочени кон поддршка на заедницата во Кочани.
„Процесот на лекување и тагување е долг и тежок. За семејствата ова е најтежок период. Ние сме тука за да испратиме силна порака на солидарност,“ изјави амбасадорот на ЕУ во земјава.
Прв на целта стигна скопјанец со јасна порака:
„Трката ја завршив без тешкотии – мислите ми беа кај нив. Го посветувам овој момент на жртвите.“
Веднаш зад него стигна млада девојка со порака до мајките од Кочани:
„Мотивацијата беше огромна. Денот е тивок и тажен, како да тагува и природата. На семејствата им испраќаме љубов и сила.“
Помеѓу учесниците имаше и најмлади кои со своето присуство покажаа дека солидарноста нема возраст. Атмосферата во сите градови беше исполнета со тишина, почит и искрено сочувство.
Хуманитарната трка покажа дека болката можеби не може да се избрише, но може да се ублажи со заеднички чекори, солидарност и сплотеност. Кочани не е сам.
