Кај обвинетиот Џеваир Камбери во затвор пронајдени 13 мобилни и лаптоп – се правдаше дека „ги нашол таму“

Со 15-минутно доцнење и тензична атмосфера започна денешното рочиште за трагедијата во „Пулс“. Уште пред да се отвори главната расправа, судијката Дијана Груевска Илиевска го соочи обвинетиот Џеваир Камбери со сериозен прекршок направен додека е во притвор.

Според информациите соопштени во судницата, при претрес во ќелијата на Камбери во истражниот затвор „Скопје“, биле пронајдени дури 13 мобилни телефони и еден лап-топ.

На прашањето на судијката за пронајдените уреди, Камбери даде бизарно оправдување: „Јас ги најдов таму уште кога влегов“, рече обвинетиот.

Судијката не го прифати ова објаснување, остро возвраќајќи: „13 мобилни телефони ги најдовте вие? Ве молам, знаете што следува понатаму – самица и други мерки.“

Кој е Џеваир Камбери? Камбери е обвинет како службено лице – Советник во Министерството за економија. Според обвинението, тој е еден од клучните луѓе во синџирот за издавање на спорните лиценци за „Пулс“. Тој се товари дека примал поткуп и фалсификувал службени исправи, наводно земајќи 226.000 денари за да издаде фалсификувана лиценца за кабаре без запазена процедура.