Изборот на консултант и надзор над „Бехтел и Енка“ оценет за еден од „матните“ настани во март

Изборот на консултант и надзор над изградбата на автопатиштата на коридорите 8 и 10-д кои ќе ги гради „Бехтел и Енка“ е оценет за еден од „матните настани“ за март, покажала анкетата за корупција на „Транспаренси Интернашнал-Македонија“ во рамки на проектот „Бистро-Матно“.

Во анкетата се наведува дека неколку од партнерските комании во победничкиот конзорциум за надзор над изградбата на коридорите, предводен од „ИРД инженеринг“, имаат претходна историја со неетичко и неодговорно постапување во својата работа.

„Меѓународниот конзорциум ‘ИРД инженеринг’ ќе биде консултант и надзор за автопатиштата на коридорите 8 и 10-д што ќе ги гради американско-турскиот конзорциум ‘Бехтел и Енка’. Понудата на ‘ИРД инженеринг’ е во износ од 1 374 304 070 денари (22,35 милиони евра). Неколку партнерски фирми во конзорциумот имаат претходна историја со неетичко и неодговорно постапување во својата работа“, пишуваат од „Транспаренси Интернешнл-Македонија“.

Од друга страна пак, како „бистри настани“ за март е и отворениот предмет од страна на ОЈО за надзорот над изградбата на автопатиштата на „Бехтел и Енка“.

„Основното јавно обвинителство за гонење организиран криминал и корупција (ОЈО ГОКК) по допрен глас отвори предмет за надзорот над изградбата на автопатите, кои се дел од коридорите 8 и 10-д. Предметот е распореден кај надлежен јавен обвинител, кој презема дејствија и ќе изврши проверки, по што ќе донесе јавнообвинителска одлука за понатамошниот тек на постапката“, посочуваат од таму.

Меѓу останатите „матни настани“ за минатиот месец се констатираниот судир на интереси на Агенцијата за филм при распределба на средствата за ланскиот конкурс и застарување на судски предмети.

Четвртиот „матен настан“ е поврзан со тројцата ексдиректори од случајот „Маѓар телеком“ осудени во отсуство на по осум години затвор.