Ивановска во обвинителство – дали сите пријави за исказ се доставуваат со полиција праша таа
Нешто повеќе од еден час траеше давањето исказ во Јавното Обвинителство на поранешната прва антикорупционерка и актуелен кандидат за градоначалник на Центар Билјана Ивановска. Таа во Обвинителството дојде со својот адвокат, исто така поранешен антикорупционер Драган Малиновски. Според Ивановска пријавата која е поднесена за неа е нејасна, бидејќи како што истакна се однесувала на начинот како бил отворен предметот, кој како што посочи е затворен без да има некаква одлука за мерки или пријава. Ивановска рече дека е поднесена од познат пријавител, но не сакаше да открие ниту кој е тој, ниту за кој предмет се работи бидејќи се уште е отворена постапката.
-Она што било спорно за пријавувачот е на кој начин ние сме комуницирале со јавноста а вие знаете дека ние како ДКСК бевме премногу транспарентни можеби и ги споделувавме предметите и информациите со јавноста без никаков проблем за тоа. На обвинителката и ја објаснив постапката како постапува ДКСК која е улогата на претседателот на Комисијата, јас како претседателка ги потпишував одлуките кои што колективно се носат од страна на Комисијата, изјави Билјана Ивановска, екс претседателка на ДКСК.
Дали според начинот на кој е поднесена пријава останува сомнежот кај неа дека е поднесен поради нејзината кандидатура за градоначалник на општина Центар, Ивановска со контрапрашање дали сите пријави ги доставуваат со полиција.
-Ако Јавното обвинителство постапувало секогаш ревносно и за кратко време ги доставувало пријавите кај што треба, тогаш никој немал да се посомнева зошто па сега, зошто па утре или задутре. Оттука произлегуваат сомнежите. Мене ми е прашањето дали сите пријави кои што биле архивирани на 25.07. се доставени на 14.08. кај оние што треба да ги примат и тоа од страна на полиција, изјави Билјана Ивановска, екс претседателка на ДКСК.
Ивановска својана кандидатура за прв човек на Центар ја објави пред 5 дена зад која застанаа неколку граѓански иницијативи од платформата „Независни заедно“, а само неколку часа потоа на нејзината врата се појавиле двајца полицајци кои и врачиле покана да се јави во Обвинителство поради кривичната пријава.
