Ивановска: Убијците на Росица и нејзиниот татко имаат име и презиме, а тие се неодговорноста и корупцијата!
„Убијците на Росица и нејзиниот татко имаат име и презиме, а тие се неодговорноста и корупцијата. Професионална истрага треба да покаже кој од овие фактори преовладувал или пак и двата заедно довеле до тоа Росица веќе да не е меѓу нас,“ изјави денеска пред МВР поранешната претседателка на Антикорупциската комисија и кандидатка за градоначалник на Општина Центар, Билјана Ивановска.
Таа посочи дека корупцијата е длабоко вкоренета во сите пори на општеството и порача државата да преземе мерки за прекинување на, како што рече, „заднинско-политичките мрежи“ кои ја хранат корупцијата.
„За тоа е потребна волја, и тоа не само политичка, туку и граѓанска. Нашите заложби се насочени кон надминување на слабостите кои создаваат високо ниво на корупција. Пред сѐ, потребно е подигнување на свеста и интегритетот на граѓаните. Институциите мора конечно да профункционираат професионално, со сите услови за работа, и да престанат да бидат заложници на партиско-политичките влијанија,“ истакна Ивановска.
Таа додаде дека очекува внатрешните контроли во институциите што биле дел од процесот да утврдат каде настанале пропустите и јавно да ги посочат одговорните лица кои придонеле за трагедијата.
Носителката на листата за Град Скопје од „Независни заедно“, Јана Белчева, рече дека заедно со Ивановска, како кандидати на локално ниво, се обврзуваат да постават нов принцип на работење со цел да ја вратат безбедноста кај граѓаните.
Според Белчева, превенцијата е најважната задача на локалната самоуправа и таа нагласи дека и во Општина Центар и во Град Скопје ќе работат на создавање безбеден град.
