„Италија ќе биде круна на нашите кариери – ќе уживаме во Бари!“
Македонија својата цел во своето трето учество на Европските првенства ја оствари, па сега Ѓорѓиев посочи дека тој и соиграчите ќе уживаат во еден спектакл во Бари, против светскиот и европски првак, кој е фаворит за круната и на овој континентален собир.
„Од овој турнир ќе го извлечеме само позитивното – Македонија ја вивнавме меѓу најдобрите 16, сега ќе напредуваме на ранглистата, долгорочно тоа многу ќе ни донесе, за следните квалификации, ќе играме Златна лига, а зашто да не и СП 2027. Италија ќе ни биде круна на кариерите, играме против светски и европски првак. И ќе уживаме во преполна сала, со одлична атмосфера како што знаат Италијанците да направат. Ние ќе го дадеме најдоброто од себе, баш тоа македонското од нас, ќе играме со милион отсто од силите, се надевам тоа ќе биде доволно за сет, два, па зошто да не сониваме и за победа? Јас сум борец, соиграчите исто така, не се предаваме, ќе излеземе да се удриме гради во гради… Не се плашам од никого, а тие на терен треба да заслужат да нѐ победат. За нас, дали тоа ќе биде доволно за 15-20 поени или сет – ќе видиме. Наше е прво да уживаме и да го живееме сонот“, рече Ѓорѓиев.
„Алал вера за Чешка како нѐ прочита. Многу добро не прочитаа, мислев нивниот техничар ќе им биде најслаба алка, заедно игравме во Фридрихсхафен, но излезе најдобар, вистински диригент. И секоја чест за нив. Јас против Чешка сум играл десетпати и никогаш не сум победикл, едноставно тој нивен стил не ни одговара. Може и бевме уморни, потрошени од сиве овие денови“, додаде Ѓорѓиев.
