Исплатата на платите за вработените во културата е во тек и ќе заврши денеска
Министерството за култура и туризам информира дека исплатата на платите за вработените во културните институции е во координација со Министерството за финансии и ќе биде целосно завршена денеска. Од Министерството додаваат дека дел од институциите веќе ја добиле својата плата и најавуваат официјална средба со Синдикатот на културата.
– Целосно сме посветени на решавање на проблемите со исплатата на платите. Веруваме дека социјалниот дијалог мора да продолжи, велат од Министерството.
Најавуваат и покана за средба со претставниците на Синдикатот, со цел да се разгледаат сите отворени прашања во духот на заемна почит и партнерство.
– Дијалогот е клучен за долгорочни решенија кои ќе обезбедат стабилност на културните институции и достоинство за културните работници. Работиме на одржливи резултати преку заедничка одговорност, нагласуваат од Министерството.
Премиерот Христијан Мицкоски, одговарајќи на пратенички прашања, потврди дека платите се исплатуваат согласно Колективниот договор, иако, како што рече, договорот бил потпишан без согласност од Министерството за финансии.
– И покрај тоа, платите се исплатени со зголемување, според договорот кој веќе е истечен. Подготвени сме да седнеме со синдикатите и да разговараме за нов договор што ќе ѝ даде вистински сјај на културата. Културните работници заслужуваат вистински претставници, изјави Мицкоски.
Заменик министерот за финансии, Николче Јанкуловски, соопшти од собраниската говорница дека до крајот на денот ќе бидат исплатени сите културни установи.
– Исплатени се околу 87 милиони денари. Овој проблем се повторува со години. Сега Министерството за финансии сериозно се ангажира да го реши, изјави Јанкуловски.
Поради доцнењето на платите за март, Синдикатот на културата (СКРМ) одржа протестен совет пред Министерството. Претставниците побараа достоинствени услови за работа, почитување на Колективниот договор, транспарентно и професионално управување со институциите, стратегија за културен развој и нов Закон за култура со учество на културните работници.
СКРМ доби поддршка и од Сојузот на синдикатите на Македонија. Претседателот на СОНК, Јаким Неделков, повика на итна средба со министерот Зоран Љутков, предупредувајќи дека во спротивно ќе се разгледуваат и радикални чекори, вклучително и штрајк.
