Исламски отпор ја презеде одговорноста за нападите во кои загинаа тројца американски војници
Исламски отпор во Ирак-фракција поддржана од Иран, ја презеде одговорноста за нападот со дрон врз американската база во Јордан во која загинаа тројца американски војници, а над 30 беа ранети.
„Силите на организацијата почнаа напади со беспилотни летала в зори во неделата, како дел од напорите да се спротивстават на американските окупациски сили во Ирак и како одговор на израелските масакри врз нашиот народ во Газа“, напиша милитантната група на Телеграм.
Ова е првпат американски војници да бидат убиени од непријателски оган на Блискиот Исток од почетокот на војната во Газа. Претседателот Бајден ги обвини милитантните групи поддржани од Иран и вети дека ќе ги смета за одговорни. Најави одговор за смртоносниот напад.
„Имавме тешка ноќ на Блискиот Исток. Изгубивме тројца храбри војници во напад на една од нашите бази, и ќе одговориме“, изјави Џо Бајден, претседател на САД.
Техеран негира вмешаност. Шефот на иранската дипломатија во неколку наврати претходно посочи дека војната во палестинската енклава може да ја влоши безбедноста во регионот.
„Од почетокот на кризата јасно кажавме дека војната не е решение и дека војната може да ја влоши безбедноста на регионот. Тоа на сите ќе ни наштети“, изјави Хосеин Амирабдолахиан, министер за надворешни работи на Иран.
Нападот се случува во момент на неколкунеделни преговори и напори конфликтот меѓу Израел и Газа да не се прелее пошироко на Блискиот Исток. Сепак, последните случувања ги ставаат под прашалник црвените линии на САД и даваат нова итност во напорите за ослободување на заложниците во Газа во замена за продолжен прекин на огнот во Газа.
