Иран успешно лансираше нов сателит
Иран со години ги развива своите воздушни и вселенски капацитети, тврдејќи дека тоа го прави за мирни цели и во согласност со резолуцијата на Советот за безбедност на Обединетите нации.
Иран успешно лансираше нов истражувачки сателит, објавија официјалните медиуми за нова фаза во развојот на воздушните и вселенските активности на земјата и покрај западните санкции.
Сателитот Сораја, произведен од Иранската вселенска агенција, беше успешно лансиран со ракетата Каем-100 на Иранската револуционерна гарда, објави иранската државна телевизија, пренесува Бета.
Сателитот беше испратен во орбитата на 750 километри над Земјата, што е првпат Иран да испрати сателит на надморска височина над 500 километри, јавува новинската агенција ИРНА.
Министерот за телекомуникации Иса Зарепур изјави дека Сораја е истражувачки сателит со тежина од речиси 50 килограми.
Иран со години ги развива своите воздушни и вселенски капацитети, тврдејќи дека тоа го прави за мирни цели и во согласност со резолуцијата на Советот за безбедност на Обединетите нации.
Меѓутоа, западните влади стравуваат дека системите за лансирање на сателити имаат технологија што може да се користи за балистички ракети кои можат да носат нуклеарна боева глава.
Ракетата „Каем-100“ ја разви Иранската револуционерна гарда, идеолошката армија на Иран, која во септември објави дека го поставила сателитот „Нур-3“ во орбитата на 450 километри над Земјата.
Најавите за лансирање на сателитот доаѓаат во време на зголемени тензии на Блискиот Исток поради војната на Израел со Хамас во Појасот Газа и само неколку дена откако Иран и Пакистан разменија воздушни напади.
