Инженерската комора со предупредување: Новиот Закон за енергетика ја загрозува приватноста на граѓаните
Инженерската институција на Република Македонија испрати остро предупредување до јавноста и институциите, укажувајќи дека новите законски измени во Законот за енергетика сериозно го нарушуваат правото на приватност и неповредливост на домот на граѓаните.
Според предупредувањето, предлог-законот предвидува овластени лица од операторите на системите за електрична енергија, гас и топлинска енергија да имаат директен пристап до делови од приватниот имот каде се наоѓаат мерните уреди, без судска одлука. Во случај на одбивање, граѓаните ќе се соочуваат со парична казна од 250 евра.
Инженерската институција нагласува дека оваа одредба е спротивна на Уставот, каде член 26 гарантира неповредливост на домот, која може да се ограничи само по судски пат и во исклучителни случаи како спречување на криминал или заштита на здравјето. „Овозможување административен пристап заради технички или комерцијални причини на приватни и странски компании, без судска контрола, е директен напад на уставните права на граѓаните“, се вели во реакцијата.
Оттаму повикуваат пратениците да бидат внимателни при усвојување на новата регулатива и да не дозволат донесување на закон кој влегува во судир со темелните човекови права.
„Станува збор за прашање кое ги засега сите – ова не е само техничка дебата, туку борба за заштита на приватноста и достоинството на секој граѓанин“, порачуваат од инженерската фела.
