Инвеститор што бил поканет од државата да вложува, остава вработени во неизвесност?
Најголемата фармацевтска компанија од Албанија, ЦФО Фарма, е еден од сопствениците на приватната болница „Оне Хоспитал“ од Тетово, чии вработени вчера излегоа на протест поради нередовна исплата и доцнење на платите и придонесите.
Албанската компанија за продажба на лекови на големо е сопственик на оваа болница од јануари 2024, а инаку на вчерашниот протест во медиумска изјава претставник на вработените рече дека проблемите започнале пред речиси две години со промената на сопственичката структура и менаџментот.
One Hospital своевремено започна со работа во медицинскиот центар во Тетово со 100 вработени и две поликлиники во Скопје и Гостивар. Во меѓувреме сопственикот „Динчер Глобал“ се нашол на удар на доверители и извршители, според податоците од Централен регистар. Во овој период албанската CFO Pharma, преку својата филијала во Македонија, ЦФО Пхарма Интернатионал, влегува во сопствеништвото на „Динчер Глобал“ и доаѓа до промена на директорот.
Интересно е тоа што Агенцијата за странски инвестиции и промоција на извозот во 2023 на средба во Тирана ја поканиле CFO Pharma да инвестира во Македонија, иако македонската подружница ЦФО Пхарма Интернатионал е основана уште од 2017. ЦФО Пхарма Интернатионал има и филијала за продажба на лекови на големо во Тетово.
„CFO Pharma располага со модерна и напредна инфраструктура за дистрибуција на фармацевтски производи, покрај тоа имаат квалификуван кадар со искуство во индустријата и ги следат високите стандарди за квалитет и безбедност“, гласеа тогашните пофалби упатени од агенцијата.
– Се обраќаме до приватната општа болница „Оне Хоспитал“ Тетово, како и до сите надлежни институции во име на сите претходно вработени колеги кои неволно и приморано ја напуштија болницата. Целта на ова обраќање е да се информира јавноста што точно се случува. Со промена на сопственоста и менаџментот на болницата пред речиси 2 години, дојде до несакани однесувања и непочитување кон медицинскиот персонал кој и онака е во недостиг во Македонија. Однесувањето беше најнапред со доцнење на месечните плати и надоместоци, сè до комплетна неисплата, при што вработените останаа без основни средства за живот, без пензинско и здравствено осигурување што си носеше за секое семејство различни непријатни последици – рече докторката Билјана Божиновска, специјалист радиолог во изјава што ја пренесе „Слободен Печат“.
Тековен и поранешен медицински кадар од „Оне Хоспитал“ Тетово барале да им се исплатат платите и надоместоците што ги изработиле. Се работело за илјадници евра, а неплатени им се и ноќни часови. За проблемот пријавувале во Управата за финансиска полиција, Државниот трудов инспекторат, Управата за јавни приходи, но институциите останале пасивни.
А.К.
