Интер се мачеше, ама го скрши Удинезе за да се врати на минус 15 од Наполи (ВИДЕО)
Холандскиот репрезентативен бек Дензел Думфрис спаси чист гол во контранападот на Удинезе преку Ајзак Саксес, триесетина секунди пред голот на Мхитарјан, па скапо црно-белите ја платија себичноста во акцијата четири на два, по што во противнападот, Ерменецот даде гол за да донесе триумф. Аргентинецот Лаутаро минута пред крајот стави печат на победата, откако минута претходно промаши зицер за да дојде до својот 13-ти сезонава за миланскиот гигант.
Интер поведе со гол од ниту една шанса, преку Белгиецот Ромелу Лукаку од пенал во 20-та минута, а Санди Ловриќ израмни две минути пред полувремето од првиот и единствен директен шут кон голот на Интер во првиот дел.
Марко Силвестри, голманот на Удинезе потоа блескаше во вториот дел со неколку извонредни интервенции за да спречи погодоци на „нераѕурите“, но не можеше да го сопре и ударот на Мхитарјан за да го спаси од пораз својот тим.
Интер ја запиша 15-та победа сезонава и сега има 47 бода од 23 меча, 15 помалку од Наполи на 15 кола до крајот на сезоната. За Удинезе ова беше седми пораз сезонава и четврти меч во низа без триумф, па остана на 30-те бода на деветото место.
