Инфлацијата во Македонија паѓа под 10 проценти
Од почетокот на енергетската криза, за првпат стапката на инфлација во Македонија падна под 10 проценти, соопшти Државната агенција за статистика.
Во однос на јуни лани, трошоците на живот годинава во истиот месец се зголемени за 9,3 отсто.
Статистичарите пресметале дека за да се помине месецот се потребни 48.500 денари, што е за 500 денари помалку во однос на потрошувачката кошничка за месец мај.
За една година храната поскапе. Лебот и житариците се продаваат по зголемена цена од речиси 27 отсто. Млеко, сирење и јајца речиси 26 отсто, месото над 25 отсто. Само маслата и мастите поевтинија за 5,3 отсто.
Од Министерството за финансии велат дека ова се охрабрувачки податоци, бидејќи инфлацијата е намалена за повеќе од 10 отсто, во однос на октомври 2022 година кога изнесуваше 19,8 отсто.
