Инфантино потврди: Саудиска Арабија ќе биде домаќин на СП 2034!
Првиот човек на ФИФА, Џани Инфантино, преку изјава на социјалните мрежи ја обзнани веста која се исчекуваше, давајќи свој пригоден коментар.
„Процесите за наддавање беа одобрени со консензус преку Советот на ФИФА, каде што се претставени сите шест конфедерации, по конструктивен дијалог и опсежни консултации. Благодарам на сите што учествувавте во оваа позитивна размена. Фудбалот го обединува светот како ниеден друг спорт, а Светското првенство на ФИФА е совршен приказ за порака за единство и инклузивност, а дава и важна илустрација за тоа како различните култури можат да бидат заедно и како можат да учат и подобро да се разбираат една со друга. Додека живееме во се повеќе поделен и агресивен свет, уште еднаш покажуваме дека фудбалот, водечкиот глобален спорт, обединува како ништо друго. На сите ни требаат овие прилики на единство, а претстојните Светски првенства на ФИФА даваат единствена сила за добро во ова“, прокоментира Инфантино.
На почетокот на минатиот месец беше потврдено дека Мундијалот во 2030 година ќе го организираат Шпанија, Португалија и Мароко, а три меча од него ќе се одиграат во Аргентина, Парагвај и во Уругвај, во знак на стогодишнината од првото Светско првенство. Со оглед дека четири години пред тоа, во 2026, СП ќе се одржи во Канада, САД и во Мексико, Инфантино го потенцира глобалниот карактер на фудбалот, претставен во присуството на пет континента, во распон од три Мундијали.
„Три изданија, пет континенти и десет земји вклучени во организирање натпревари на турнирот – тоа го прави фудбалот навистина глобален!“, додаде Инфантино.
Улогата на домаќин на С. Арабија на едно СП е само продолженија на инвазивното вложување на оваа земја во фудбалот, во последниве две години, главно преку купување скапи фудбалери, во сопствената лига.
