Имотот на „Трансмет“ раскрчмен за евтини пари, „Пуцко Петрол“ најмногу во ќар
Имотот на Трансмет кој требало да биде конфискуван во случајот „Труст“ бил преземен од фирми и банки за многу помали суми со што била направена штета од 12,4 милиони евра за државата, објави Државната комисија за спречување на корупција.
Во шемата во која биле инволвирани проценители, нотари и извршители најмногу зела фирмата Пуцко Петрол на Асмир Јахоски, кој купил имот за дури 4,5 милиони евра поевтино.
До осомничените и обвинетите протекувале информации, а во шемата биле вмешани и фирмата на Хана Јахоска, Би Холдинг, како и фирмата АД Астра на поранешниот директор на Шпаркасе банка Сашо Боко (хрватски државјанин).
– Проценителите на вредноста на имотот на Трансмет сториле злоупотреба на службена положба со начинот на кој го вреднувале имотот со што бил оштетен државниот буџет, рече Шемши Салаи, член на ДКСК.
Според ДКСК, Државното правобранителството и Агенција за управување со одземен имот воопшто не го заштитиле имотот кој требало да се води како конфискуван.
