Илијевски: Нема веќе да навивам за Партизан, се срамам од Гробарите!

Претседателот на Партијата на Македонците во Србија кажа дека веќе не може да навива за српскиот тим по скандалозните пароли кои се појавија на трибините за време на натпреварот меѓу Партизан и Вардар.

„Не можам веќе да навивам за Партизан по ова што се случи. Замислете како им е на Македонците во Србија. За Партизан играле многу Македонци, а ги има и денска во тимот. Јас сум Македонец што цел живот навива за Партизан. Најголем дел од Македонците во Србија навиваат за овој тим и се срамам за однесувањето на Гробарите. Тоа што го направија е говор на омраза“, вели Илијевски.

Илијевски побара и осуда од надлежните институции во Србија, Партизан, но и српската јавност.

„Барам реакција од надлежните институции, ракометниот клуб и спортското друштво да го осудат и да се оградат од навредливиот транспарент кој се појави на трибините“, кажа првиот човек на македонската заедница во Србија.

Вардар го загуби мечот на гостувањето во Белград со 22-28 од Партизан во СЕХА-лигата.