Илјадници протестираа во Франција против полициското насилство

Десетици илјади се приклучија на протестот „против полициското насилство“ вчера во неколку француски градови, вклучително и во Париз, каде тројца полицајци беа полесно повредени во напад на нивниот автомобил, пренесе Франс прес.

Според француското Министерство за внатрешни работи, околу 31.300 луѓе (вклучувајќи 9.000 во Париз) учествувале на протестите низ целата земја. а според синдикатот Генерална конфедерација на трудот и радикалната левица „Непослушна Франција“ – околу 80.000 луѓе, од кои 15.000 во Париз.

Околу стотина синдикати, политички организации и други групи повикаа на оваа демонстрација, која ја поддржаа и 150 филмаџии.

Во главниот град, по мирниот почеток, поворка од стотици лица со качулки ги скрши стаклата на филијалите на банките и фрлаше со камења врз полициски автомобил.

Според полициската префектура, автомобилот, кој бил заглавен во сообраќаен метеж, бил нападнат „со железни прачки“. Еден од полицајците накратко излегол од возилото со пиштол во рака за да ги држи демонстрантите подалеку, според неколку видеа објавени на социјалните мрежи, чија автентичност ја потврдил полициски извор.

Другите полицајци кои пристигнале да помогнат го прекинале нападот.

Тројца од четворицата полицајци во автомобилот се полесно повредени, изјави за медиумите началникот на полицијата Лоран Нунес. „Во моментов работиме на обидот да ги идентификуваме сторителите на овој напад. Сега имаме три лица за кои се верува дека се вклучени во овие акции кои се уапсени“, додаде тој.

Според извештајот објавен подоцна во вечерните часови од МВР, вкупно шест лица се уапсени низ Франција.