Илјадници Израелци уште еднаш протестираа против контроверзниот закон
Десетици илјади луѓе повторно протестираа во Израел против планираните реформи во правосудството, десетта сабота по ред. Протестите не покажуваат знаци на забавување, а во некои градови е забележан рекорден број учесници, јавуваат израелските медиуми.
Само во градот Тел Авив на улиците излегоа околу 145.000 демонстранти, а во Хаифа околу 50.000. Протести против контроверзната судска реформа се одржаа и во Ерусалим, Бершеба, Еилат и неколку други градови. Пред неколку дена, израелскиот претседател Исак Херцог за прв пат јавно проговори против плановите на десничарската влада.
Тој рече дека реформата во судството е грешка, дека е репресивна и дека ги поткопува демократските основи на Израел. Тој рече и дека е договорен компромис меѓу поддржувачите и противниците на реформата. Деталите за компромисот се уште не се познати на јавноста. Клучните елементи на реформата би можеле да поминат на последното гласање во парламентот следната недела, објавија израелските медиуми.
Според плановите на владата на премиерот Бенјамин Нетанјаху, парламентот ќе може да ги поништи одлуките на Врховниот суд со просто мнозинство. Дополнително, политичарите ќе добијат поголемо влијание врз назначувањето на судиите. Критичарите го гледаат тоа како закана за демократската поделба на власта и стравуваат дека реформите би можеле да му овозможат на Нетанјаху да избегне осуда во неговото судење за корупција.
