Иде нивното време! Која македонска државна фирма направи 305.000 евра промет во само еден ден?
Македонската берза за струја полека, но сигурно го завзема своето „место под сонцето“. Државна фирма која работи во пазарно опкружување. Платформа на која се тргува струја по цени утврдени преку алгоритам кој ги собира понудените количини мегавати и предложените цени за купување на тие мегаватчасови. Денешната просечна цена е 100 евра за еден мегаватчас, а прометот е над 300.000 евра. Истргувата количина не е помала од 20 отсто од дневниот конзум за електрична енергија.
Македонската берза за струја вчера направи промет од продажба на електрична енергија вреден 305.716 евра (според средниот курс на НБРМ н.з.), покажуваат официјалните податоци на Операторот на пазар за електрична енергија.
Производители и трговци, регистрирани учесници на пазарот за електрична енергија вчера меѓу себе истргувале 3.090 мегаватчасови електрична енергија преку платформата на македонската државна берза за струја која е единствен регистриран оператор на пазар за електрична енергија. Поточно преку платформата на Операторот на пазар за електрична енергија (Сегмент тргување Ден однапред н.з.) како што всушност формално-правно се вика македонската берза за струја вчера бил направен промет на 3.090 мегаватчасови кои ќе се испорачаат на потрошувачите денеска и за нив ќе бидат наплатени 305.716 евра.
Е сега, првата и најважна функција на берзата за струја е таа што тој правен субјект гарантира дека тој што ја платил струја и ќе ја добие, а тој што ја продал ќе ги добие парите.
За да биде појасно колку од вкупната потрошувачка на електрична енергија во земјава се тргува преку нашата берза вредно е да се знае контекстот. Односно колку електрична енергија дневно, во овој период од годината, се троши во Македонија. Според последните податоци од МЕПСО (кои се однесуваат на последната седмица во септември) тоа што вчера се продало на берза, а ќе се потроши денеска изнесува најмалку 20 отсто од целиот конзум на електрична енергија.
Кои се најскапи часови, а кога струјата е најевтина?
Податоците на берзата покажуваат дека највисока цена струјата постигнала испораката за денеска од 18 до 19 часот. Цената на секој превземен мегават-час е 139,6 евра. Количината што е платена по таа цена е 104,5 мегаватчасови.
Интересно е што благодарејќи на „притисокот“ од фотоволтаиците и нивното производство во „топлите и светли дневни часови“ цената на струјата на берза е најниска во периодот од 11 до 16 часот. А најниска е на пладне поточно од 12 до 13 часот. Во тој период цената на мегаватчас паѓа на 55 евра. Заради тоа и за тој час од денот биле пазарени 151 мегаватчас електрична енергија.
Најголема количина на струја е истргувана во периодот од 23 до 24 часот. Вкупно 153,7 мегават-часови по цена од 98 евра за еден мегаватчас електрична енергија.
Просечната цена за еден мегаватчас за испорака денеска постигната на берза е околу 100 евра.
Повеќе детали на следниот линк https://dam.memo.mk/?page_id=252399&lang=mk
Р.Ф.
foto freepik.com/josemiguelsangar
