И здравје и работа: „60 милиони руски причини за да се изгради рударскиот комплекс Иловица“
Главниот политикант од Струмичката котлина се јави со непристоен предлог после пресот на концесионерот на Иловица со кој најавија меѓународна арбитража тешка милијарди евра. Според неговото најново писание најдобро било да сме му исплатиле на концесионерот онолку колку што инвестирал до сега (60 милиони евра) за реализација на проектот и да исчезне од животите на лажните еко активисти, објавува здружението на граѓани од струмичката котлина „И Здравје и Работа“.
Клучната дилема e зошто овој самопрогласен заштитник на Македонија од нови рудници толку лесно се расфрла со 60 милиони евра? Да не стојат зад понудата неговите налогодавачи? Овој непристоен предлог неодоливо потсетува на оној на руските газди на Бучим до концесионерот на Иловица, кој во 2019 звучел вака – или ние теренски ќе го реализираме проектот Иловица-Штука или нема никогаш да го изградите (читај ќе ви го хушкаме локалното население).
Дали некој после пресот на концесионерот за арбитража гледа шанса да ја преземе концесијата за Иловица-Штука? Особено ако политичката партија на која јавно и се восхитува главниот политикант стане дел од идната извршна власт?
Жителите на Струмичката котлина прочитаа дека зад лажните еко активисти стојат антизападни центри на моќ. Затоа се повеќе се осамени. Нивната задача е да шират постојан страв по здравјето и животната средина и да креираат незадоволство кое ќе ги притиска партиите да носат погрешни политички одлуки под закана за помалку гласови на разни избори. И за оваа улога лажните еко активисти профитираат.
Нивната најголема “жетва” е сега пред изборите. Мудро би било најодговорните политички партии да не влетаат во замката што им ја местат анти НАТО играчи кои сакаат македонскиот бакар да остане во нивна надлежност. Доволно е да ги прашаат овие уценувачи зошто никогаш не протестираат против Бучим, рудник за бакар изграден во 70-те години на минатиот век?
Модерен рударски комплекс Иловица со највисоки светски еколошки стандарди е економски излез за Струмичката котлина и за целата држава. Формула за враќање на младите назад во регионот.
Затоа, уште еднаш повторуваме ако Македонија изгуби на арбитража тогаш лажните активисти ќе добијат кривични пријави за доведување на државата во подредена правна положба и нанесување на тешки штети врз државниот буџет!
П.С. Ако оние кои стојат зад лажните еко активисти навистина мислат дека милијарди евра тешката арбитража е блеф, тогаш зошто “нудат” 60 милиони евра за покривање на досегашните трошоци на концесионерот?
