ИЈЗ ГИ ОБЈАВИ РЕЗУЛТАТИТЕ ОД ТРУБАРЕВО: Нема зголемена радиоактивност во воздухот, водата и почвата
Деталните анализи на воздухот, водата и почвата од околината на опожарениот објект во Трубарево не покажуваат зголемени нивоа на радиоактивност, соопшти денеска Институтот за јавно здравје (ИЈЗ), отфрлајќи ги стравувањата на јавноста за радијациона опасност по пожарот во фабриката за рециклирање. Резултатите од мерењата за присуство на тешки метали во почвата се очекуваат во текот на утрешниот ден.
Стручен тим од ИЈЗ, во координација со Државниот инспекторат за животна средина и Министерството за здравство, извршил вонредна контрола и земал примероци од воздух, вода од водовод, бунари и бари, како и од почва, за испитување на радиоактивност и физичко-хемиска анализа.
Според објавените резултати:
Воздух и вода: Испитувањата за јонизирачко зрачење (радијација) покажале дека вредностите се во рамки на нормалните референтни граници, без никакво отстапување.
Тешки метали во вода: Анализите не покажале отстапувања од вредностите за содржина на тешки метали. Единствено е регистриран индикатор за зголемена содржина на органски материи во подземната вода, за кои од ИЈЗ велат дека се од друго потекло.
Радиоактивност во почва: Лабораториските анализи на примероци од почвата за присуство на специфични радионуклиди (Радиум-226, Ториум-232 и Калиум-40) исто така потврдиле дека нема зголемена радиоактивност, во согласност со законските прописи.
Дополнително, тимот за радијациона заштита на ИЈЗ извршил и директни дозиметриски мерења на самиот терен, на шест мерни точки во кругот на фабриката, вклучително и на влезот во опожарениот склад. Заклучокот од овие мерења е дека на ниту едно место не е констатирано зголемување на радијацијата, а измерените вредности се во рамките на природниот фон на зрачење.
Од Институтот за јавно здравје најавуваат дека резултатите од последната анализа – за присуство на тешки метали во земените примероци од почва – ќе бидат готови и јавно објавени во текот на утрешниот ден.
