И треба да сме горди! На која голема европска земја и продадовме стоки за 3 милијарди евра?
Македонскиот извоз во Германија за 10 месеци годинава надмина 3 милијарди евра. Тоа е голем успех особено затоа што годинава имаше многу скепса и црни сценарија за забавување на германската економија, намалување на увозот и последиците од тоа. Не се случи тоа, напротив. Германија останува најголем конзумент на македонскиот извоз и двигател на македонската извозна ориентирана економија
Македонскиот извоз во Германија за првите девет месеци годинава надмина 3 милијарди евра, потврди Државниот завод за статистика, кој на крајот на минатата недела ги објави најновите податоци за трговската размена со светот.
И уште еднаш по којзнае кој пат се потврди фактот дека македонската економија во голема мерка е зависна од германското стопанство, а македонската валута – денарот од еврата кои доаѓаат од германските компании за македонските стоки.
Во споредба со истиот периот претходната година забележливо е дека нема промени односно вредноста на извозот е речиси идентична или најпрецизно годинава отстапуваме за 0,1% во споредба со истиот период лани.
Во првите десет месеци германската економија апсорбирала стоки од Македонија во вредност од 3,086 милијарди евра. Ако се анализира резултатот од аспект на стравувањата дека германската економија цело време оди по „црвената линија“ на рецесијата заради проблемите со екстерните шокови од замената на руски гас од една страна и постојаното испраќање воена, хуманитарна и финансиска помош за Украина од друга страна, може да се заклучи дека годинава добро поминавме.
Германскиот конзум на македонски производи е клучниот и најголем импулс за одржување на работоспособна односно фунционална македонска економија. Затоа што македонската економија обезбеди прилив од над 3 милијарди евра кои се просто неопходни за да кај нас работите во економијата се одвиваат па макар и со подзабавено темпо.
Од друга страна Германија во целиот македонски извоз учествува со 44,4 отсто што укажува и на огромна зависност на нашата извозно ориентирана економија на можни шокови во германското стопанство. Сепак, ризикот иако постои сепак е повеќе теоретски затоа што германската економија е моторот за економскиот систем на Европската унија. И што е поважно Германија е една од најголемите 10 извозно ориентирани економии во светот. А ние треба да сме горди со тоа што соодносот во трговската размена со Германија е да се изразиме фудбалски 3:1 за нас.
Како стоиме во трговијата со соседите?
За жал, не е најсјајно. Во најголемите 10 трговски партнери на Македонија има четири земји. Од нив, единствено со Косово имаме трговска размена во која нашиот извоз е поголем од нивниот увоз. Но затоа пак Србија, Грција и Бугарија кај нас продаваат повеќе нивни стоки одошто купуваат наши.
Најголем трговски партнер од соседите е Грција. Нивниот увоз во Македонија за 10 месеци надмина 885 милиони евра. Во најголема мерка вредноста на увозот ја сочинува дизелот, бензините, автоплинот, мазутот и керозинот што увезуваме од таму. Нашите фирми во Грција во овој период извезле стоки вредни околу 260 милиони евра.
Србија е наш традиционален трговски партнер. И тука во размената поминуваме подобро отколку со Грција иако сме во кусок од околу 240 милиони евра за 10 месеци. Нашиот увоз таму е речиси 326 милиони евра и е речиси ист како и со Косово. За 10 месеци од северниот сосед сме увезле стоки во вредност од 565 милиони евра.
Со Бугарија и покрај влошените политички врски имаме затоплување на економските релации. Со нив имаме најмал трговски дефицит во однос на Грција и на Србија. Нашата економија таму извезла стоки вредни 309 милиони евра и тоа во голема мерка е руден концентрат од рудниците за олово и цинк „Саса“, „Злетово“ и „Тораница“. Бугарскиот увоз во овој период изнесува 392 милиони евра и тука доминира струјата.
Со Косоварите нашата трговска размена е традиционално во плус. Годинава трговскиот суфицит е 247 милиони евра , нашиот извоз таму изнесува 328 милиони евра.
Р.Ф.
