И по 35 години, нема двојна круна за Реал (ВИДЕО)
„Црвено-белите“ со тоа се одмаздија за минатонеделниот пораз во полуфиналето од Суперкупот на Шпанија кога загубија со 3-5, исто така по продолженија, но најважно е тоа што обезбедија пласман во четвртфиналето од Купот. Победата на Атлетико е апсолутно заслужена ако се знае дека домашниот тим го диктираше темпото, водеше со 1-0 и 2-1 преку Лино и Мората пред Облак со автогол и Хоселу да израмнат и да го однесат мечот во дополнителни 30 минути.
И во нив беше максимално драматично, Гризман во 100. минута по трет пат го донесе Атлетико во водство, Реал нешто подоцна постигна гол, но тој беше поништен поради офсајд на Белингам. Конечниот резултат го постави Рикелме во 119. минута.
Поразот од Атлетико значи дека Реал и по 35 години нема да ја освои двојната круна во шпанскиот фудбал (трофеи во првенството и Копа дел Реј). Последен пат тоа го направи во 1989 година, а оттогаш не беше ни блиску до овој потфат бидејќи рано испаѓаше во Купот или од трката за титулата во Ла Лига.
Покрај Атлетико, пласман во четвртфиналето од Копа дел Реј обезбедија уште: Барселона, Атлетик Билбао, Селта, Мајорка, Сосиедад, Жирона и Севиља. Ждрепката за следната фаза ќе се одржи утре во 13 часот.
