И ОВА ГО ИМА НА БАЛКАНОТ: Украла државни пари за да купи скапи чевли
Поранешната секретарка на хрватскиот претседател Зоран Милановиќ, Сандра Жељко ќе оди во затвор, затоа што украла државни пари за да купи скапи чевли.
Таа ќе помине четири ипол години во затвор бидејќи проневерила најмалку 130.000 евра од државната каса заедно со тогашниот шеф на кабинетот на Милановиќ, Томислав Сауча. При претресот на нејзиниот стан полицијата во плакарот за чевли пронашла повеќе од 80 чифта луксузни чевли, вредни 50.000 евра.
Тие двајца се осудени на затворска казна уште во 2020 година, но Врховниот суд во Хрватска дури сега ја прогласи за конечна. За оваа одлука Жељко дознала сосема случајно затоа што никој од институцијата претходно не ја известил.
„Случајно го видов написот на еден портал, барав нешто, веќе не знам точно што. И кога ја видов конечната пресуда, помислив дека тоа е некаква грешка. Дека можеби е погрешна формулацијата или нешто. Не разбрав, бев шокирана. Влегов во статијата и го видов датумот, 21 март. Бев изненадена, во неверување, не знам што да кажам“, изјави Жељко за локалните медиуми.
Покрај затворската казна, забрането им е да извршуваат јавна функција во следните пет години. И двајцата треба да ја вратат незаконски стекнатата имотна корист, при што Сауча платил 50.000 евра, а Сандра Жељко 80.000.
Според пресудата, Жељко проневерилa многу повеќе пари од нејзиниот тогашен шеф. Таа за хрватските медиуми изјави дека не е виновна и дека само си ја работи својата работа.
Жељко за чевлите се бранеше дека ги купила во претходните 30 години од кариерата, најмногу на попусти и дека ги чувала внимателно.
„Тоа беше главната атракција за полицајците, моите чевли“. Ако мојот криминал се тие чевли… дојдов од Вуковар, останав без ништо. Морам да напоменам дека немам деца, сама сум и со платата си купував што сакав. А ако има некакви брендови, тие секогаш се купуваат со попусти од 50 до 70 проценти. Ако моите чевли се проблем во целата работа, не знам што да кажам. Затоа што, ако имало нешто во мојот стан, тогаш ќе го покажале, немало да се занимаваат со моите чевли“, рече Жељко.
Изјавила дека највисоката цена што ја платила за чевлите била околу 2.150 евра, а некои од нив ги дели со мајка си и со сестра си, со кои и живее.
