И МАЛА, И ПРЕПОЛОВЕНА – што ја падна ланската добивка на „Силекс“, не достигна ни 200 илјади евра

Минатата година не му одело сосема
добро на рударскиот комбинат „Силекс“ од Кратово.

Така барем зборува Билансот на успех
на ова акционерско друштво објавен на Берзата за минатата година. Тој покажува
дека лани комбинатот доживеал речиси преполовување на добивката, или прецизно,
нејзино намалување за 43 проценти.

Конкретно, во 2023 година „Силекс“
остварил чист профит од 188 илјади евра, што е намалување од 43 отсто во однос
на претходната 2022 година, кога профитот тежел 332 илјади евра.

Што го преполови профитот на кратовскиот комбинат?

Ако се погледне неговиот биланс на успех може да се види дека на име на
оперативни приходи во компанијата се слеале 1,1 милиони евра, што е иако за
скромни 2 отсто, сепак пораст во однос на приходите остварени од 2022 година.

Главниот дел од овие приходи се оние остварени од продажбата и тоа целосно
на домашниот пазар, каде е регистрирано зголемување за пет проценти.

И всушност, одговорот за намалената
добивка е во многу повеќе зголемените расходи наспроти приходите. Имено, кај
нив е забележан пораст од дури 45 проценти, со што тие дошле до ниво од 995 илјади
евра.

А, што е тоа што ги зголемило трошењата во 2023 година.

Билансот на успех говори дека најголема трошковна ставка е амортизацијата
на материјалните и нематеријалните средства, која на компанијата и донела
расход од 603 илјади евра, што е раст за 11 проценти во однос на претходната
година.

Набавната вредност на трговските стоки е прилично мала сума и кај неа има
пад од 30 проценти.

И огромна ставка на расходната
страна се останатите расходи од дејноста, за кои се платени 359 илјади евра, и
каде што растот е дури 287 проценти, или за повеќе од три пати.

Она што е забележливо е дека
комбинатот ниту во 2022, ниту во 2023 година, не прикажал воопшто никакви
трошоци за вработени, и таа ставка во двете години е буквално нула.

И, сето тоа прави оперативната добивка да изнесува 209 илјади евра, или за
41 отсто помалку во однос на претходната година.

Компанијата немала воопшто финансиски приходи или расходи во 2023 година.

Основна дејност на Силекс е рударството и вадење на камен.

Н.Н.Ф.