ХРВАТСКИ МИНИСТЕР ИМ ОДБРУСИ НА ПЕКАРИТЕ: Нема никаква причина за зголемување на цената на лебот
Министерот за економија и одржлив развој на Хрватска Давор Филиповиќ денеска изјави дека нема оправдана причина за покачување на цените на кој било производ.
На новинарско прашање како ја коментира најавата на некои пекари во таа земја дека ќе ги поскапат лебот и пекарските производи, Филиповиќ одговори дека нема намера да дебатира со пекарите и дека нема оправдана причина за поскапување.
„Не мислам да дебатирам со пекарите. Реков дека нема оправдана причина за поскапување на кој било производ“, рече Филиповиќ одговарајќи на новинарски прашања.
Тој повтори дека Хрватска има тренд на забавување на инфлацијата, која е на најниско ниво од јануари 2021 година.
Кога ќе се погледне структурата на инфлацијата, може да се забележи пад на цените на прехранбените производи и енергијата, рече тој.
Ова, како што рече, е резултат на владините мерки за ограничување на цената на енергенсите и затоа, посочи, нема оправдана причина за поскапување.
Прашан дали Владата ќе ги повлече субвенциите доколку поскапе лебот, тој рече дека владиниот пакет мерки трае до 31 март 2024 година, а потоа ќе се види што ќе се преземе.
„Прашањето дали некој сака да ја зголеми цената на нешто е прашање за тие луѓе“, рече тој.
Пословни.хр
Фото: Фејсбук
