ХРВАТСКИ ХОТЕЛИЕР: Се плашам дека оваа туристичка сезона ќе имаме еден голем проблем
Опатија деновиве е преполна со весели и насмеани луѓе желни за убаво поминување и услуга, а тоа се очекува за цела сезона, изјави хотелиерот Милан Шесар во Дневник на N1. Сепак, тој предупредува дека туристичкиот сектор ќе се соочи со една голема пречка.
„Се плашам дека ќе имаме еден голем проблем. Фрижидерите ни се полни со стока – од риба, месо и друга храна, но се плашам дека нема кој да ги понуди и подготви, односно одреден број луѓе да не добијат соодветна услуга. Ова е најголемиот проблем на нашата професија – работниците нè напуштаат, а нови не доаѓаат.
Кај нас доаѓаат луѓе со тотално незнаење, кои никогаш не работеле во оваа професија, а потоа додека се приспособат, пак си заминуваат“, рече Шесар, нагласувајќи дека целото општество мора да биде загрижено за работната сила, особено во туризмот.
„Не е лесно да се работи во туризмот. Треба да знаете јазици, да му пријдете на гостинот, да продавате стока, а тоа не може да го научи некој што пристигнал вчера од улица. Се плашам дека ова ќе ни биде најголемиот проблем летово – да немаме кој да послужи, да продаде, да ги земеме еврата што гостинот е подготвен да ги потроши“, смета хотелиерот од Ичиќи.
Тој нуди две решенија за овој проблем
Решението на овој проблем тој го гледа во два правци: „Едната формула е добро да се платат овие луѓе, а другата е целата заедница да најде формула како да инвестира и да ги убеди младите да останат тука и да не одат во странство, дека можат да имаат квалитетна егзистенција од својата работа и да бидат задоволни“.
На прашањето колку заработуваат келнерите во нивниот хотел, тој одговори дека тоа се внатрешни работи и додаде:
„Мојот келнер би заработил исто како во Италија, ако не и повеќе. Мојот персонал работи по 25, 30 години, што е знак дека се соодветно наградени бидејќи во спротивно немаше да останат толку долго“.
Тој рече и дека лично нема проблем со работната сила бидејќи нивните работници имаат иста плата во текот на целата година. „Кога човек знае дека ќе добие подеднакво добра плата и дека е безбедно, тогаш нема ни да помисли да продолжи понатаму“, вели тој.
Индекс.хр
