Хамас барале помош од Босанците?
Групата Хамас бара поддршка и од Босна и Херцеговина (БиХ). Првиот човек на радикалната исламистичка организација Хамас, одговорен за нападот врз Израел кој почна на 7 октомври, побарал поддршка од властите на БиХ во специјално писмо што го испратил на адреса на министерот за надворешни работи на Босна и Херцеговина, Елмедин Конаковиќ, пишуваат денеска локалните медиуми.
Порталот istraga.ba објави копија од писмото потпишано и испратено на адреса на Конаковиќ на 11 месецов. Писмото го пратил Исмаил Ханија, политичкиот лидер на Хамас. Копијата изгледа автентично, а писмото е на хартија која ги содржи официјалните обележја на таа организација, пренесува Н1.
Министерството за надворешни работи на БиХ не го коментираше ова писмо, но партијата Народ и Правда (НиП), предводена од Конаковиќ, во четвртокот зборуваше за конфликтите на Блискиот Исток со соопштение во кое го осудува секое насилство, особено насилството врз цивилите.
Откако Хамас почна да врши напади врз Израел, имаше повици муслиманските земји да се обединат и да им помогнат на Палестинците. Во Израел има воени дејствија, а низ Европа имаше терористички напади, и тоа напад имаше во Франција, каде лице од руската република Ингушетија уби професор во средно училиште, потоа Тунижанец изврши напад во Брисел, а во Милано во Италија беше спречен напад. Во Франција имаше евакуација на аеродроми, но и на познати туристички знаменитости во Париз.
