ГРОМ обвинува: Четири години советниците на ВМРО-ДПМНЕ гласале „против“ напредокот на општината
Партијата ГРОМ соопшти дека изградбата на катни гаражи во општина Карпош била спречена поради тоа што советниците на ВМРО-ДПМНЕ во изминатите четири години гласале против секоја одлука поврзана со овој проект.
„Катните гаражи не паѓаат од небо – тие се носат со одлука на Советот. А советниците на ВМРО-ДПМНЕ гласаа против“, стои во соопштението.
Од ГРОМ тврдат дека со ваквото однесување биле блокирани и други клучни проекти, меѓу кои и решенија за паркирањето во Лептокрија, Карпош 1 и Млечен.
„Советниците на ВМРО-ДПМНЕ гласаа против доделување средства на ‘Лајка’ за заловување на бездомните кучиња, против исплата на плати на наставниците и негувателките, против вработување на квалитетни правници во општината, па дури и против предлогот граѓаните кои живеат околу Сити мол да можат да ги паркираат возилата внатре во молот. Своите куќи ги легализираа, а беа против останатите граѓани да го остварат своето право“, наведуваат од партијата.
ГРОМ порача дека, наместо блокади и „инает политика“, граѓаните на Карпош очекуваат решенија и реализација на проекти. „Катните гаражи ќе ги има – но само ако граѓаните изберат одговорност наместо инает, работа наместо блокади и визија наместо празни обвинувања“, се вели во соопштението.
Партијата додава дека на локалните избори на 19 октомври граѓаните ќе имаат можност „да се ослободат од политиката на инает и блокади“.
