Грција ги подели првите трговски ознаки „Macedonia the Great“
Управниот одбор на Здружението на извозници вчера официјално ги одобри првите 30 трговски ознаки за „македонските“ производи, кои ќе ги добијат бизнисите, објави АНА-МПА.
Ознаката Macedonia the Great што Здружението на извозници ја регистрираше на меѓународно ниво ќе ja носат сите производи и услуги произведени во регионот Македонија кои што ќе бидат наменети за извоз.
„Ние ја даваме оваа значка на нашите бизниси-членки бесплатно. Зедовме за право да се рекламираме пред потрошувачите и кога ќе го видат во странство да разберат дека тоа е грчки производ кој исто така ги исполнува сите стандарди на ЕУ“, рече претседателот Симеон Дијамантидис.
„Macedonia the Great“ се новите колективни трговски ознаки за грчките производи од грчката област Македонија, односно, како што велат во Грција, т.н. македонски производи.
Ознаката и слоганот со кои грчките производи ќе бидат пропратени на меѓународно ниво, беа презентирани во Солун од Здружението на извозници на Грција, во присуство на грчкиот премиер Кирјакос Мицотакис пред три и пол години.
По презентацијата, грчкиот премиер рече дека новата колективна ознака „отсега, па натаму ќе ги придружува македонските производи и услуги низ целиот свет“.
