ГРЧКАТА ПОЛИЦИЈА ГО ЗАБРАНИ СОБИРОТ НА АЛБАНЦИТЕ ВО АТИНА: Образложија зошто се решиле на ваков чекор

Грчката полиција го забрани денешниот најавен собир на Албанците во Атина. 

Како што јави грчкиот медиум Прототема, властите соопштија дека со одлуката на директорот на полицијата на Југоисточна Атика е забрането одржување на собир на Албанците. На социјалните мрежи за 19 часот е најавена средба на Албанците во улицата „Корис“, во населбата Алимос.

Грчката полиција соопшти дека е одлучено да се забрани овој собир со образложение дека „постои сериозна опасност од нарушување на општествено-економскиот живот на одредена област и неговото одржување ќе предизвика пречки во сообраќајот и пристапот до јавните служби, организациите за социјална заштита и институции кои обезбедуваат медицински услуги, односно функционирање на јавните инфраструктури и објекти и снабдување на пазарот со витални добра“.

Грчките медиуми реагираа на неодамнешната прослава на Денот на независноста на Албанија на главниот плоштад Синтагма во Атина, кога Албанците славеа со албански знамиња, обвинувајќи го премиерот Киријакос Мицотакис за мек пристап кон албанските имигранти, потсетува телевизијата А2.

Албанскиот премиер Еди Рама годинава имаше две средби со Албанците во Грција, во Атина и во Солун. Тој вети дека тие во иднина ќе учат на албански јазик.