ГРАДЕЖНИЦИТЕ СЕ ПОМАЛКУ ГРАДАТ – за 34,4 отсто помал бројот на одобренијата за градба
Стагнира интересот за градба во земјава последниве месеци покажуваат податоците на Државниот завод за статистика.
Согласно најновите податоци, во јануари годинава биле издадени 256 одобренија за градење, што е за 34,4 отсто помалку во однос на истиот месец лани, покажуваат податоците на Државниот завод за статистика.
– Според издадените одобренија за градење, предвидената вредност на објектите изнесува 4.503.536 илјади денари, што е за 41,6 отсто помалку во однос на истиот месец од претходната година.
Од вкупниот број на издадени одобренија за градење, 166 или 64,8 проценти се наменети за објекти од високоградба, 48 или 18,8 отсто за објекти од нискоградба и 42 или 16,4 проценти за објекти за реконструкција.
Од вкупно 256 објекти, на 164 (64,1 отсто) како инвеститори се јавуваат физички лица, а на 92 објекти (35,9 проценти) инвеститори се деловни субјекти.
Во извештајниот период е предвидена изградба на 615 станови, со вкупна корисна површина од 56 031 метри квадратни – посочуваат од Статистика.
Она што се забележува е дека намалувањето на бројот на одбренија не се случува само во јануари, туку напротив присутен е веќе подолг период, а помалку одобренија има континуирано последните месеци.
Па така во декември 2023 година биле издадени 293 одобренија за градење, што е за 4,6 отсто помалку во однос на истиот месец од претходната година.
Слична тенденција имало и во ноември 2023 година, кога се издадени 318 одобренија за градење, што е за 10,2 проценти помалку во однос на истиот месец од претходната година.
И во октомври 2023 година ситуацијата биле слична, па тогаш биле издадени 325 одобренија за градење, што е за 12,9 отсто помалку во однос на истиот месец од 2022 година.
