Градежна комора: Државата не може да ја регулира цената на становите
Градежната комора денеска реагира дека државата, односно Акционерското друштво за стопанисување со станбен и деловен простор (поранешен ПУИК), не можат да ја регулираат цената на становите. Од таму велат дека во догледно време нема да има намалување на цените, кои изминатите година дена енормно нараснаа за овој тип на недвижнини.
Ваквата реакција следува откако Зоран Ѓоргијев, директор на АД за изградба и стопанисување со станбен и деловен простор, вчера изјави дека цената на квадратен метар станбена површина ќе се намалува. Тој рече дека Акционерското друштво како регулатор на цената почнува да гради на нови локации, а на намалување на цената ќе влијае и поевтинувањето на градежните материјали.
– ПУИК никогаш не бил и нема да биде регулатор на цената. Во моментов освен пробелм што е малата понуда на станови, уште поголем проблем е недостигот на квалитетни станбени единици. Цената не очекуваме дека ќе ја достигне онаа пред ковид кризата, но очекувањата се дека ќе се стабилизира на 20-25 отсто повисока од пред Ковидот, рече Андреа Серафимовски од Градежна комор во вестите на Телевизија 24.
Тој додаде и дека цените на репроматеријалите во моментов се неконзистентни. Ѓоргиев пак вчера рече дека трендот на енормно зголемени цени за квадратен метар не е само кај нас, туку во регионот и во цела Европа, но во периодот што следува се очекува намалување.
„Според она како се движат цените сега, има извесно намалување на градежните материјали. Ние како државна фирма сме регулатор на цената. Затоа сега набргу ќе почне градба во старата воена пекарница за да можеме на ова лудило во државата и во целиот регион за цената на квадратен метар да му бидеме некаков регулатор. Мислам дека цените ќе одат во некој благ пад надолу“, рече директорот Ѓоргијев.
