Граѓаните на Струмица маршираа за чист воздух: Народе, време е да ги разбудиме заспаните институции!
Синоќа, низ улиците на Струмица се одржа протестен марш во организација на Здружението „Здрава котлина“, како реакција на долгогодишното загадување од запалените депонии и инертноста на надлежните институции.
Протестот започна со остри пораки и повик до институциите да преземат одговорност:
„Народе, време е да ги разбудиме заспаните институции кои, во скапо платен сон, си ги префрлуваат надлежностите и задолженијата додека сите заедно се труеме со чадот од депониите!“ – порачаа организаторите.
Како што нагласија, загадувањето е хроничен проблем кој се провлекува со години, а сценариото секогаш е исто – во зима вината паѓа врз домаќинствата, а во лето, институциите се прогласуваат за ненадлежни.
„Истите актери палат, истите џебови се полнат, бизниси со рециклирање никнуваат и фантомски функционираат, додека институциите се парализирани и молчат“ – истакнаа од здружението.
„Здрава котлина“ упати и сериозна критика до локалните власти, посочувајќи дека градоначалниците на Струмица, Василево, Босилово и Ново Село со своето молчење и неделување, во период кога над месец и пол гори ѓубре, „покажаа дека функцијата им служи само за удобност, а не за одговорност.“
Протестниот марш заврши со порака за продолжување на борбата – за здив, за живот и за иднината на жителите на Струмичката котлина. Организаторите најавија нови активности и повикаа на масовна граѓанска мобилизација.
