Граѓаните ќе можат да ги отповикуваат градоначалниците преку референдум
Градоначалниците повеќе нема да бидат недопирливи – за нивно отповикување ќе може да се организира референдум, доколку тоа го побараат најмалку 20 проценти од граѓаните со право на глас во општината. Ова е предвидено со измените и дополнувањата на Законот за локална самоуправа, кои ги образложи министерот за локална самоуправа, Перински.
Референдумот ќе го распишува општинскиот совет, а истиот ќе се смета за успешен доколку на него излезе и гласа најмалку една третина од впишаните избирачи во општината.
Пратеничките групи од ЗНАМ и „Вреди“ дадоа поддршка за измените, оценувајќи дека со тоа се става крај на апсолутната власт на некои градоначалници. Како пример беше посочен случајот со Рамиз Мерко.
Покрај механизмот за отповикување, новините во законот предвидуваат и воведување на комунални инспектори, главен градски архитект, задолжителна дигитализација на услугите, како и поголема фискална децентрализација.
Законот нема да важи за актуелните градоначалници, туку ќе се применува по локалните избори што треба да се одржат оваа есен.
