„ГОРДОСТА“ НА ГЕРМАНИЈА НА ПРОДАЖБА: Кинезите сакаат да ги купат фабриките на Фолксваген кои компанијата ги затвора

Кинеските власти и производителите на автомобили се
заинтересирани за германските фабрики кои се планирани за затворање, а особено
се заинтересирани за локациите на Фолксваген, изјави за Ројтерс извор запознаен
со размислувањето на кинеската влада. Купувањето на фабриките ќе и овозможи на Кина да го зајакне
своето влијание во ценетата германска автомобилска индустрија, дом на некои од
најстарите и најпрестижните автомобилски марки, додаде изворот.

Кинеските компании веќе инвестираа во низа сектори во
Германија, најголемата европска економија, од телекомуникациите до роботиката,
но допрва треба да основаат традиционални фабрики за автомобили, иако
Mercedes-Benz има два големи кинески акционери.

Овој потег би можел да претставува политички најчувствителна
инвестиција на Кина досега. Фолксваген долго време е симбол на германската
индустриска моќ, сега загрозена од глобалното економско забавување и
предизвиците на транзицијата кон зелени технологии. Производството на
автомобили во Германија за европскиот пазар ќе им овозможи на кинеските
производители на електрични возила да ги избегнат царините на ЕУ за увоз од
Кина, што дополнително ќе ја загрози конкурентноста на европските
производители.

Понудите може да доаѓаат од приватни компании, државни
претпријатија или заеднички вложувања со странски компании, додека кинеските
власти го задржуваат правото да одобруваат одредени странски инвестиции и
најверојатно ќе бидат вклучени од самиот почеток. Одлуките за инвестирање ќе
зависат од ставот на новата германска влада кон Кина по изборите во февруари,
рече изворот.

Економските односи меѓу двете земји се продлабочија за време
на 16-годишното владеење на Ангела Меркел, благодарение на инвестициите и извозот
на германските производители на автомобили во Кина. Но, односите се заладија
бидејќи сегашната коалиција се обидува да ја намали зависноста од Кина.
Министерката за надворешни работи Аналена Баербок го опиша претседателот Си
Џинпинг како „диктатор“, а Кина како ривал.

Фолксваген истражува алтернативни намени за своите фабрики
во Дрезден и Оснабрик како дел од програмата за намалување на трошоците и
реструктуирање на неговите операции во Германија. Продажбата во Европа на
најголемиот производител на автомобили, сопственик на брендови како Порше, Ауди
и Шкода, опаѓа поради зголемената конкуренција од кинеските компании.

Раководството на VW сакаше да затвори неколку фабрики, но
наиде на отпор од синдикатите. Според договорот постигнат пред Божик, одлучено
е производството во Дрезден, каде што 340 работници работат на електричниот
ID.3, да престане во 2025 година, а во Оснабрик, каде 2.300 вработени го
произведуваат T-Roc Cabrio, во 2027 година.

Фолксваген би бил подготвен да ја продаде фабриката во Оснабрик
на кинески купувач, изјави извор запознаен со размислувањата на компанијата.
„Ние сме посветени на изнаоѓање понатамошно користење на локацијата. Целта мора
да биде одржливо решение кое ќе ги земе предвид интересите на компанијата и
вработените“, рече портпаролот, одбивајќи да ги коментира шпекулациите за
понудата.

Кинеските компании се загрижени за тоа како ќе бидат
прифатени од германските синдикати, кои имаат половина од местата во
советодавните одбори на германските компании и бараат широки гаранции за
локациите и работните места, изјави извор запознаен со размислувањето на Кина.
Претставникот на синдикатот Стефан Солдански рече дека работниците во Оснабрик
нема да имаат ништо против да произведуваат за еден од кинеските партнери на
VW. „Можам да замислам како произведуваме нешто за кинеско заедничко вложување
… но под логото на VW и според стандардите на VW. Тоа е клучен услов“, рече
тој.

Портпаролот на кинеското Министерство за надворешни работи
изјави дека тоа треба да им се дозволи на компаниите кои сакаат да инвестираат
во Германија.

Продажбата на фабриките може да биде поевтина за VW отколку
да ги затвори, изјави банкар запознаен со работењето на компанијата, додавајќи
дека фабриките би можеле да достигнат цена од 100 до 300 милиони евра. VW не ја
коментираше вредноста на имотот.

Многу кинески производители на автомобили бараат локации за
фабрики во Европа за да ги заобиколат тарифите воведени минатата година од
Европската комисија поради, како што тврди, неправедните субвенции во Кина.
Повеќето од нив досега одлучија да градат нови фабрики во поевтини земји, како
што се BYD во Унгарија и Турција, додека Leapmotor планира производство со
Stellantis во Полска, а Chery Auto започнува производство на електрични возила
во поранешна фабрика на Nissan во Шпанија оваа година.

фото: EPA-EFE/Filip Singer